[demokrasi]

[Memleketlerine dönen gayr-ı Müslimlere emlak ve mallarının iade edilmesiyle Müslüman mülteci ve muhacirlerin sefalet ve mağduriyetlerine imkân verilmeyecek şekilde barındırılmalarına dair Dahiliye Nezâreti'nden çeşitli vilâyet ve mutasarrıflıklara şifre telgraf.]

23 R. 1337 (26 Ocak 1919)

Bâb-ı Alî

Dâhiliye Nezâreti

Aşâyir ve Muhâcirîn Müdîriyyet-i Umûmiyyesi

İskân Şu‘besi

Husûsî: 34[698]



Edirne                           Vilâyeti'ne                               Canik                           Mutasarrıflığı'na         

Erzurum                              "                                      Eskişehir                                    "

Adana                                "                                      İzmit                                         "

Ankara                               "                                      Bolu                                          "

Aydın                                 "                                      Teke                                         "

Bitlis                                  "                                      Çatalca                                     "

Hüdâvendigâr                      "                                      Karahisâr-ı Sâhib                          "

Diyârbekir                           "                                      Kal‘a-i                                        "

Sivas                                 "                                      Sultâniyye                                  "             

Trabzon                              "                                     Karesi                                        "

Kastamonu                          "                                     Kayseri                                       "               

Konya                                 "                                    Kütahya                                      "

Ma‘mûretü'l-azîz                    "                                    Menteşe                                     "
 
Van                                    "                                    Niğde                                         "
 
Memleketlerine avdet etmekde olan gayr-ı Müslimlerin derhâl emvâl ve emlâkine sâhib olmaları ve te’mîn eylemeleri (?) ne derece mültezim ise açıkda kalan Müslim mültecî ve muhâcirlerin sefâlet ve mağdûriyetlerine mahal verilmeyerek eldeki (?) ta‘lîmâtnâme dâ’iresinde mahall-i münâsibeye tevzî‘ ve ibâteleri matlûbdur. Ba‘zı mahallerde vukû‘ bulan iş‘ârât [ve is]tihbârâtdan anlaşıldığı üzere sâhibleri avdet etmeyen eşhâsa â’id mebânînin de derhâl tahliyesine teşebbüs ve tevessül edilmekde olması bir kısım me’mûrînin gayretkeşliğine ma‘tûf ve binâberîn bu yüzden birçok muhâcirînin fuzûlî sefâlet [ve] mağdûriyetini müstelzim olmakla merdûd ve müsebbibleri içün şiddetle mûcib-i mes’ûliyyetdir. Evvel ve âhir teblîğ edildiği ve 18 Kânûn-ı Evvel sene [1]334 târîhli ta‘lîmâtnâmede de tasrîh olunduğu üzere i‘âde-i emvâlin sâhiblerinin avdet ve mürâca‘atına ta‘lîki ve hasbe'z-zarûr açıkda kalacak olan muhâcirîne de mümkinü'l-icrâ mu‘âvenetin îfâsıyla mezkûr ta‘lîmâtnâme mûcebince mahall-i münâsibeye tevzî‘ ve iskânları ve içlerinden muhtâc-ı mu‘âvenet bulunanlarına yevmiye veya mukâbili ekmek zahîre i‘tâsı ile sefâletlerine mahal ve meydân bırakılmaması sûret-i kat‘iyyede tekrâr teblîğ olunur.

Fî 26 Kânûn-ı Sânî sene [1]335

       Nâzır Vekîli

   Ahmed İzzet

BOA. DH. ŞFR, nr. 95/256


Belgeler
Resimlerin Görüntülenmesine İzin Verilmiyor
Resimleri Görebilmek İçin Üye Ol veya Giriş Yap